忽發奇想

呢排真係做野做到傻, 晚晚8點後放工, 放學後又返公司做野, 星期六日又返公司做野, 放工返屋企食完飯又返公司做野。終於明白到, 星期一至五晚放工後係無可能溫書的......

今日在公司對住部電腦, 做到個腦都實晒, 突然有個好鬼浪漫o既想法:

依家香港好多樓上書店或小型書店, 賣各種類型的書, 就係唔多見專賣攝影書的店鋪, 亦唔多聽聞。網上成日有人問邊度有二手攝影書店, 亦無人回覆。其實依家市面的攝影書和攝影雜誌都不便宜, 特別雜誌, 次次見到都好想買, 但翻落其實想看的只有小部分。於是忽發奇想開一間專賣攝影書, 二手攝影書和雜誌的店鋪, 不一定賣, 給愛攝影的人舒適坐在店內看亦可, 任佢地打書釘。

通常睇開攝影書, 就手癢想實習一下, 又想請教下專家, 咁點算呢? 於是想到如果店內有各種機和鏡頭給客人任試又如何呢? 試影就要有野影先得吧? 咁如果將店鋪開在西貢等依山傍海的地方又如何呢? 客人可以踏出門口就影到景。咁影其他又如何呢? 店前種植花草樹木, 又可給人影花, 一試微距鏡的手癮。店內又可順便經營餐廳, 煮d特色私房菜, 你話真係幾寫意呢, 又可給人影食物。攝影友光顧完又可順便遊下郊外, 哇, 真係幾寫意~! 店內如果有攝影高手駐場, 指點新手幾下, 大家又可交流一下, 不錯。

反正依家香港越來越多人玩攝影, 又無呢類型的店鋪, 睇黎真係有得諗, 可以成為一盤小生意。:)

越諗越開心......

開心完畢, 又要工作了......但一個星期的郁悶的心情終於有一刻的解脫。:)