一些小股民的心態

今日恆指又跌過千點, 收報27665點, 連日來的跌幅已達約4000點，我認為是十分健康的調整。好多優質國企股都回了逾10%, 有些回得更多。

例如平安保險, 當它由110元起, 回到88元, 已回了20%, PE雖仍是70倍, 但這是用現價除上年全年盈利, 即88/1.27=70。今個財政年度很快結束, 而且截至2007年6月30日止的每股盈利已達$1.39, 保守估計全年每股盈利比上年高出90%, 即1.27*1.9=2.41, PE即時變成36倍。

心態一:

我的同事今日都心思思, 想撈底, 但又怕未見底, 總是想撈真正的底。我之前也試過, 總是不敢入市, 總要等個市再跌才買, 當跌到心中的尺度了, 但又望它再跌才買, 總想賺盡每一毫。好快個市就急速反彈, 這時又不敢入市, 心有不甘, 於是越不甘, 個市越升, 唯有眼白白錯失投資機會。所以, 我學懂了, 不要理個價是甚麼, 只要經過分析, 是值得買, 就要即時買入, 不要望更低的價。

心態二:

有個同事想入市, 問我買咩, 我叫佢買平保, 現價是值得買入, 升值潛力有望幾個月內升逾15%至20%。即一手賺$6600至$8800。但她說: "成本要$44000, 才賺哪$8800? 好少啦!" 那我問她要怎樣才叫"好賺"? 她答到: "個成本$2萬左右, 賺$1萬幾就不錯啦!" 我想, 回報50%, 當然好賺啦, 但現在有甚麼優質股有這個能力? 總結, 對她來說, 回報是看Absolute Amount, 不是看回報率。

心態三:

本週有兩隻新股, 另一位女同事現在心思思想入市, 問我買咩, 我都是建議她買平保, 但她打算抽新股中外運, 用白表, 抽10手, 希望抽中1手以上; 以每手$4100計, 10手要$41000。照佢咁講, 佢應該有足夠現金。我問佢, 點解你寧願用$41000抽新股, 而不用$44000買入平保這隻優股呢? 佢話: "買平保要鎖死咁多錢, 分分鐘鎖2至3個月! 抽新股就唔同, 一個星期後就退款給你! 而且抽10手, 中1手機會好大, 穩中!"

好, 就當俾你抽10手, 中2手, 即$8200, 假設由交表到可以放出, 要起碼14個工作天, 即差不多3個星期; 就算可以升值60%放出, 2手共賺$4900。合計三個星期以來, 由最初投入$41000, 至最後賺$4900, 回報率是12%。但全程假設抽10手中2手, 放出時仍上升60%是十分樂觀的。然而, 今日買入平保, 3個月後上升15-20%, 是很保守的。

-------------------------------------

不過, 我自問也是一個小股民, 也有過這些心態, 但我學精了。

大市有可能繼續調整, 平保有可能再跌, 但都是那句, 只要值得買入, 就要買, 不要猶豫。若再跌多一段, 就再買入, 這樣作為長線投資, 真是倍感安心。時間就是賺錢的最佳工具。