大地震在即

我地條team原本有7個人, 3人是管理層, 4人是small potato(我是其中一名)。上星期, 其中一個小薯(F)resign了, 不是因為另謀高就, 而是因為受不了壓力, 工作壓力和精神壓力。其他同事問：「點解佢唔等埋雙糧先走?」我心諗: 「等到, 就唔洗resign啦!」

事源F因為誠信出現了問題, 被管理層日日訓話, 終於受不了, 走了。他說他要看精神科, 但姑勿論他的話是真是假, 若他繼續留職, 一定要睇精神科。我又覺得, 在呢個時勢(超忙超多野做), 少一個人手, 就多一分痛苦。現在我和另一個同事(C)一起做原本要3個人做的工作, 經已超負荷了, 系統開始發出了警告。今日, 另一個同事搵到了新工, 似乎非走不可, 因為他(T)現在做的工作, 實在沉悶兼無價值, 係人都想走, 他還開玩笑：「有邊個同你有仇, 你就介紹佢入黎做; 如果你當一個人係朋友, 就唔好介紹佢入黎。」

99%機會佢會走了, 那就只淨下2個小薯, 我和C了。要接手T的工作, 如果管理層有人性的話, 就不應叫我和C任何一人接, 因為我們已經超負荷, 再接, 睇精神科事小, 無命事大, 講真。但我們兩個都接觸過T的工作, 那我們又是「熱門人選」。我就肯定企硬不會再接T的工作, 因為之前接過, 真係玩命, 大病左2個星期, 所以今次我resign都唔會接。那如果管理層把T的工作交給C(因為C是最聽話, 最少投訴的), 那C現在的工作, 肯定有一半交給我, 那即是2個人做4個人的工作, 點頂? 無可能。

再說回工作性質, 我們team的地位越來越低賤, 做的東西越來越無價值, 真係唔知為咩? 如果再要2個人做4個人的工作, 恐怕都是上天注定還有兩個月都不能拿雙糧。再加上, C已經很多野做, 身體已經很消瘦了, 又住鬼咁遠, 家在上水, 在港島東返工, 來回超過兩小時交通, 晚晚都差不多9點後才離開office, 如果管理層咁都忍心「質」這麼多工作給C, 真係無人性。

再做下去, 真係無前途, 短期內要2個人接4個人的工作, 都唔知過唔過到除夕。睇黎我都好大機會要辭職, 即使未搵到工, 都要辭, 因為2個人接4個人的工作, 保住的是一份工, 失去的可能是健康、生活, 辭職就當是放下假吧, 反正2009年, 都未正式放過假, 都是時候休息下。請新人不是兩三個月的事, 因為要高層批準請人出招職廣告, 都要兩個月, 痴撚線! 等得新人入職, 又要教他們, 起碼要2至3個月才可放手。唔辭職? 真係挨病左, 仲慘啦。我辭了職, 真係對唔住C, 但無法子......唉.......

一個團隊, 就如同一個齒輪系統, 少了任何一個齒輪都不行。在這個時勢, 不應隨便讓任何一個員工走, 因為這樣只會形成惡性循環。我認同管理層不能容忍一個誠信有問題的人, 但非常時期, 就要用非常手段, 既然這同事能幫你們做事, 就開看一面吧。她們看到的, 只是站在自己立場看問題(因為F走了, 對她們的工作量無影響, F的工作只會由我和C分擔), 只是做她們認為是correct的, 而她們卻沒有做到suitable的, correct未必等於suitable。

這個大地震, 管理層們還不知道, 因為她們看到的仍是假的太平盛世。而T準備離職, 只有我一個知。最理想當然可以挨到拿雙糧後才辭職, 但真係很難。不過, 如果挨得到過12月, 有一個新人來, 可以分擔下, 應該不至於要辭職咁嚴重。我成日都問自己, 2個月都挨不過? 上次接T的工作, 大病2星期時(還要無得放假), 如果那時的工作量是2個單位, 那今次的工作量將會是4個或5個單位, 怎能挨得過兩個月?!

不知今次管理層們會點樣handle? 管理層們的管理哲學就是: 無論怎樣, 都不會做dirty work, dirty work只是薯仔做的事。希望她們今次可以handle得smart點。Let see.

與山東同學較量

天公造美, 今日非常好天, 返科大傾project, 順便打波(還是返科大打波, 順便傾project?)

今晚在球場上又遇到山東同學, 和他打了一個set, 雖然輸了3-6, 但好開心, 因為發覺自己真系進步了, 原來自己的實力不是那麼弱雞。不過, 山東同學今晚感冒初癒。

山東同學其實是在一個月前, 在網球場上認識的。他由山東到香港讀master, 那天他一個人來球場練波, 他見我們四個人打得咁開心, 於是又想一起打, 碰巧那日1號場無人, 於是我就過去和他搓波。一搓之下, 即刻發覺他絕對唔野少, 肯定跟過教練學, 再閑談幾句, 原來他是山東大學的校隊!! 於是我當然想和他較量, 但那天人多, 不能打全set, 於是打tie break, 最後我當然是慘敗1-6.....

今晚他主動叫我打比賽, 我當然應承, 其實我準備吞蛋0-6。不過, 可能上次交過手, 對山東同學的實力已心裡有數, 真正交手, 又不至於強弱懸殊, 有得打。真是好想下次大家都在狀態時再較量一次。

唉, 如果當年考入科大網球隊, 我有今天的實力, 咁就好啦...... :(

又進一步

2009年9月26日, 星期六

原本今晚計劃打波, 但昨晚12點幾先訓, 今早又要7點半起身同親戚飲茶, 跟住返中大開會傾project, 直踩到5點半, 再諗起打波至11點先返到屋企, 成個人即時好累(再加上之前一個星期晚晚ot到11點幾...)。本想放棄打波, 早d休息, 但難得好天, 下星期又可能落雨, 都係決定打波, 話之佢。

2點半上堂, 剛食完飯, 飯氣攻心加上阿sir講野好悶, 一於安心釣魚, 養足精神今晚打波。訓左約15至30分鐘吧, 果然精神爽。

今晚打波我又突破了自己, 不得不記錄低呢個重要時刻, 歷經6年, 我終於領悟到發球用力的要訣。之前一直著重發球穩定, 掌握球感, 發球穩定了, 但速度一直沒有提升, 一直不能用發球做武器, 所以一直都沒有把握可以保住發球局, 因為好的發球可以從頭到尾克制對手。

今晚經過幾下發球熱身, 突然掌握了那種手感, 原來要提升速度, 就是要把手完全伸直, 然後用腳帶動上身的力, 再加上擊球一刻, 球拍的揮動角度要完全正面擊在球的中心點, 這樣一個清脆利落, "pop"一聲的發球就完成。再加上此前一直有練習角度, 現在速度加角度, 已經是很好的武器。

今晚同Lleyton打得好激烈, 特別第一set, Lleyton的發球完全發揮水準(速度真系有Roddick咁快!), 所以不易破他的發球局, 而我又有信心保住自己的發球局, 這信心又來自發球的速度和控制, 真是從來都未試過有這樣的信心。所以最後要用tie break決勝, 而tie break裡, 大家都無走樣, 一直打到4-4時, Lleyton出現一個error, 隨後我繼續保住發球, 最終以7-6(7-4)取勝, 小分的7比4雖然差3分, 但其實勝負就只是那一個小分。另外, 有一分, 我同Lleyton打了不下20來回, this is the longest rally in our head-to-head history!!

第一次遇到市場錯價

記得林sir幾年前就分析到中移動股價出現市場錯價, 這個是我第一次認識"市場錯價"這個詞。以我的能力, 又怎會在股市注意到市場錯價啦, 但今日我在惠康就遇到另類市場錯價, 哈。

有一種餅, 我好鐘意食, 正價一向賣$12.9一包。 半年來, 即使特價, 都只是平均$11.5至$11.6一包, 從未低於此價。今日我去惠康買這種餅干, 發現是$24兩包, 餅干架上又寫著買滿$40九折。我計下數, 即是只要$10.8一包?! 於是一次過棒著10包去counter, 收款員打機後, 收我原價$12.9一包, 再打九折, 即$116找數。於是我說貨架寫著$24兩包, 再九折。她叫另一個人去看清楚個價錢牌, 我見她久久不回來, 於是自己去看, 豈料那個"$24兩包"的價錢牌給人拿下了。我再走去收銀櫃, 收銀員都知是打錯價, 但她都知是惠康出錯, 既然顧客見到"$24兩包"這個價錢, 就不是懶數, 於是我最后都以$108買下10包。

其實那一刻我計到$10.8一包時, 真想把整個架的這種餅買下來, 因為我每日都食, 百吃不厭。

第一次遇到市場錯價, 而又take advantage of it, 好開心, 哈哈。

CFA肥左啦

CFA Level 2 肥左lu, 雖然有d失望, 但總算盡左努力。會唔會再考? 唔會啦~
現在回想當時的情況, 真係好好好辛苦呀......

個report話我個score band 係10, "If your score band is reported as 10, you scored in the top 10% of all failed candidates", 即係緊緊肥?

再睇番每一part的成績, 又真係僅僅肥:
(括號內是比重)
Above 70%: Corporate Finance(36), Derivatives(36), Economics(18), Equity Investments(72)
51-70%: Financial Reporting & Analysis(72), Fixed Income Investments(36)
Below 50%: Alternative Investments(18), Ethical & Professional Standards(36), Portfolio Management(18), Quantitative Methods(18)

Above 70%的好多都是重磅, below 50%的是輕磅...............無野講。

又回想當年會考英文, 第一次是CCCD, 結果得D(oral, 最輕磅), 第二次再考, BCBB, 結果得C。

人生就是這樣, 付出了未必有回報, 但不付出, 就一定不會有回報。

小太陽

太陽像那大紅花，
在那東方天邊掛，
圓圓臉兒害羞像紅霞，
只是笑不說話。

太陽像個大南瓜，
在那高高天空掛，
照得滿山歡樂融融，
草兒發嫩芽。

大嘴巴，笑哈哈，
落了也要往上爬，
敬它，愛它，
我把心兒交給它。

太陽倦了便回家，
夜裏有些少驚怕，
明晨月兒落旭日重來，
依舊往上爬。

小朋友真有趣

2009年8月9日, 星期日, 能夠悠閒地在家裡休息, 聽著881電台的一個小朋友遊戲節目。今日的小朋友好有趣, 連主持也沒他們辦法, 要寫個服字。以下是兩段對白, 我都笑了出來。

第一段:
主持: 你鐘意睇咩書啊?
小朋友A: 歷史。
主持: 哇, 咁中史定西史先?
小朋友A: 中史。
主持: 咁講個中史人物名黎聽下?
小朋友A: er......一時諗唔起wor.....
主持: 咁司馬遷聽過未呀?
小朋友A: 聽過!
主持: 咁司馬遷係咩人呀?
小朋友A: 中國人!
主持: 你搞gag啊! 我想問司馬遷做咩職業?
小朋友A: 寫史記果個lor!
主持: 係勁wor!

第二段:
主持: 你學過最深的一個英文字係咩呀?
小朋友B: archaeologist。(考古學家, 我都唔識....=.= )
主持: 哇, 咁深呀, 串黎聽下?
(小朋友B串左好耐都串唔準, 卒之....)
小朋友B: a...r....c...h....a....e...o...l...o...g...i...s...t
主持: 岩啦! 咁你知唔知點解呀?
小朋友B: 考古學家。
主持: 咁「考古學」點串呀?
小朋友B: 「考古學」無得串稼wor, 淨係可以寫出黎稼ja, 中文無得串。
主持: 呀哈哈......我錯! 我錯! 係我唔好!


我越黎越鐘意聽收音機!