備份的重要性

今日差d變成「超級黑色星期五」。今日返到公司, 發現部電已經無拿拿自已息左, 我已心知不妙。重新啟動, 又開到機, 於是照常做野。但開左約半個鐘, 部腦又自已息左, 之後點都開唔番。今次慘啦, 唔知係邊度出事, 如果係硬碟出事, 就可能咩data都無晒。我係做data mining, 部腦儲存左好多有用的data和自己的心血傑作, 如果無晒, 就係從零開始。

冷靜左一陣, 憑我多年處理電腦意外的經驗話我知, 硬碟壞的機會不大, 可能係主板壞o者... IBM的技術人員檢查後, 都話塊板已經壞左, 至於硬碟有無壞, 要換塊新板再試先知。硬碟千祈唔好壞, 上天保佑......

不幸中之大幸, 係星期四晚可以順利run完一set data, 而呢個data係好重要, 好多parties都等住佢。上天留左條生路俾我, 感謝天。

經此一事, 明白到資料備份的重要性。一路以來, 我對備份的意識都不薄, 上年10月為電腦的資料做左一次備份。本來同自己講話要3個月備份一次, 但一路都好忙, 無做到。今晚星期五, 有d時間, 就下定決心要做一次備份, 將d資料燒晒落dvd, 足足燒左幾隻。有d資料尤其重要, 例如相片, mp3, 經自已辛苦收集的資料。總之今次就做左一次完整備份, 但一做就2個鐘, 由9點幾做到11點幾, 中途電腦最好咩都唔好開, 唔好做。

科技進步神速, 依家做備份輕鬆得多。一隻dvd賣$2至$3(一次買50隻果種), 支援16x速度燒錄, dvd燒錄器又平, $200一部, 而且燒錄速度可去到20x。即使我只用12x去燒, 一隻4.7GB容量(實際容量為4.5GB)的dvd, 只需7分鐘就燒完, 真係快過以前好多倍。

取捨

當仲係中學生時, 以為自己萬能, 總係希望自己咩都識, 咩都做；大學生時, 選了科, 興趣收窄, 但內心仍然希望盡量咩都識。

今日, 突然發覺人的能力真係好有限, 時間也有限, 不能咩都選擇。選擇一樣野的同時, 就要放棄另一樣野。時間就是金錢, 但選擇了時間, 就要放棄金錢; 選擇金錢, 就要放棄時間, 甚至更多。因此, 我寧願放棄金錢, 夠洗就得, 最緊要開心。

我o既興趣仍不少, 但集中發展o既, 由以前o既好多種, 變成3種, 就係金融, 網球和攝影。呢3種興趣, 又竟然係中學時代無o既。

以前成日要樣樣識, 依家只想一樣精。

學會選擇, 學會放棄。

竟然識?!

剛過去o既星期六晚, 和兩位朋友去旺角打邊爐。間鋪有電視睇。打到途中, 無線播「係咪小兒科」, 而其間問的小學問題, 我地三個大學生都唔識答。最後有一題, 係小x音樂題, 考何守信, 係一首古典音樂, 正係何守信有份演的「畢打自已人」的主題曲。話說首音樂一播, 我地三個都覺得好熟, 正當另外兩個朋友就快講到口邊時, 我竟然潜意式地即時講左曲名和作曲家名: 莫札特的「土耳其進行曲」。呢頭講完, 我仲要問返其中一位玩音樂的朋友, 我答得岩唔岩, 佢係咁話我勁。

我自認係對音樂完全無細胞, 琴棋書畫的「棋書畫」仲勉強可以話識d, 但「琴」就真係一竅不通, 但果晚我竟然答中。不過, 平日都鐘意聽下古典音樂, 巴哈、貝多芬、莫札特等都有, 覺得好舒服, 可能聽得多, 入晒腦。但聽幾多, 對樂理都係唔識, 哈哈!

有樣仲離奇......就剛剛我在電腦播那首「土耳其進行曲」, 先至播左10秒左右, 我老豆就同我講, 「呢首好似係莫札特呀o麻」。我即時呆左.....哇, 竟然連我老豆都識?! 佢有音樂細胞我唔知? 佢無可能有音樂細胞...... :D

溫完quant

原來讀master係有助溫cfa, 上個月讀完一科叫quantitative finance, 依家再讀cfa的教材, 簡直係事半功倍, 前後約10小時就可以搞掂quant呢part, 做題準確率達85%以上, 算係咁。

自問如果只係讀cfa的材料, 肯定一支半解, 甚至唔知講咩; 但讀完master的qf, 理解和感覺完全唔同。俾咁貴讀master係值得o既。

向下一part邁進: corporate finance...(第一個學期學的, 趁仲有記憶, 讀左佢先)

費達拿當爸爸

費達拿當爸爸啦, 恭喜恭喜!!

http://www.tennis.com.cn/news/international/20090313/37615.html

多謝

昨日患上腸胃炎, 今日好番好多, 仲收到一個好朋友的來電問候, 好開心, 多謝你! :)

p.s. 今晚可以食面lu, 仲可以落d肉添 :p

6月後大計

今日又開始另一個學期, 今日至6月7日將會是艱難時期, 姑且唔去諗佢, 反而開始計劃6月後的來年大計。

實在有太多野想做:

1) 6月開始踏入夏季, 又係影相的季節, 之前買的咁多攝影書籍, 一定要睇晒。
2) 過去半年的e線金融網有好多好o既節目, 要全部聽番, 做番筆記(真係書本都學唔到的知識)。
3) 07年就話要08年11月去上海睇大師賽, 但最後因為要讀書, 無去到。08年係上海最後一年舉行大師賽年終賽。09年開始, 上海都會舉行一站大師賽, 唔知幾時搞呢? 唔知費達拿會否出席? 我即使今年去唔到, 下年一定要去!
4) 今年櫻花季節過左, 明年一定要去百萬葵園影花! (講左兩年...)
5) 讀完書, 就要開始我o既五年計劃---遊廣東和雲南!
6) 好想看有關鄧小平的書。
7) 好想去日本, 但要等日元平番先。一個人去? 型!

千里之行, 始於足下。今日已開始做準備工夫第一步---$500買左個二手相機背包, Lowepro Rover AW II (rover: 流浪者)。買背包呢家野, 唔使買一手, 二手價錢平一半, 賣家又少用, 化算。