終於見到Coria啦

已經兩年無在ATP大賽見過Guillermo Coria啦, 今年法網好驚喜見到佢, 原來佢是後補因傷退賽的羅迪克。其實論實力, 論排名, Coria不算怎樣突出, 但兩年前(好似係)在中國網球公開賽見過佢打一場波之後, 就很喜歡佢的球技, 好合眼緣。不過, 佢在今次法網第一圈就出局了, 真可惜, 但始終兩年無打過職業賽, 體能始終不適應。希望佢往後能正式從返職業賽啦。:)

立法監管「縮水樓」?

最近立法會有議員動議立法監管「縮水樓」, 即是實用面積要「明碼實價」, 寫明「800尺」就真係要有800尺面積住, 這800尺不能包括花園、會所等面積。

先不理這次立法能否成功(我就認為無可能成功, 因為香港靠地產撐住, 而且好明顯政策是向地產傾斜的, 而且根據李柱銘講, 這個討論已經討論了十幾二十年), 先來問: 這個立法有無用?

我認為是無用的。理由好簡單:

地產商一定不會做蝕本生意, 任何建築面積都要收錢。現在的樓多數都有會所, 花園等公用面積來吸引客戶, 而好多客戶都以這些作為買樓指標。好了, 一座樓起好, 地產商已經計算出全座樓的總售價($1000萬)。總售價除以總面積(10,000尺), 得出單位尺價$1000。公共面積佔1000尺, 有9個單位, 每個單位1000尺。地產商會以每個單位1111尺(實際只有1000尺), 每尺$1000出售。若硬要地產商明碼實價, 每個單位1000尺就要標明1000尺, 咁你覺得每個單位的單位尺價仍是$1000嗎? 當然無可能, 單位尺價會升為$1111! 咁咪即係一樣.....只不過係買家條氣順d.....

另一個類似的例子, 正正是今日我的一位男同事order了一碗兩送面, $16, 無升價, 有無可能? 結果佢打開碗面, 我見到d送的份量比以前明顯少了, 而佢食完, 即刻大嚷「食完等於無食!」, 因為成碗面的份量減了! 咪話男同事, 另一女同事都話唔飽! 佢話只有原來的2/3! 最後佢都寧願碗面加價, 保持分量。

經營者無論如何都會保持profit margin, 飲食如是, 地產商更是。地產商都是上市公司, 先不要說私利, 最低限度佢都一定會「為股東爭取最大利益」。所以無論點立法, 買家付出的都是一樣。

黃子華與母親節

今日是母親節, 正在看亞視的《樂壇風雲50年》, 今晚主題是唱歌頌母親或與母親有關的歌, 可以話首首都好好聽。

有首歌, 是很經典, 很好聽的, 這是陳百強唱的《念親恩》。憑著歌名, 人人都會認為今晚是唱這首歌的最好時刻。我一向也都這麼認為, 但直至去過黃子華上年的一場棟篤笑《越大鑊越快樂》, 看法真是180度轉變 ! 《念親恩》呢首歌原來很不適合在今晚這個場合唱! 我真是很佩服黃子華, 真是唔知佢個腦平時諗咩, 哈哈!

先看看《念親恩》的歌詞:

長夜空虛使我懷舊事　
明月朗　相對念母親　
父母親愛心柔善像碧月　
懷念怎不悲莫禁　

長夜空虛枕冷夜半泣　
遙路遠　碧海示我心　
父母親愛心柔善像碧月　
常在心裡　問何日報　

親恩應該報　
應該識取孝道　
唯獨我離別　無法偎親旁　
輕彈曲韻夢中送　

長夜空虛枕冷夜半泣　
遙路遠　碧海示我心　
父母親愛心柔善像碧月　
常在心裡　問何日報

哈, 睇完紅色的字, 都應該明白... 死人黃子華就在佢個show點出紅色的point。當場佢講了一個實例, 一個兒子在佢母親個生日宴上, 親口唱了首《念親恩》。黃子華話, 佢阿媽「生勾勾」坐係度, 佢竟然唱呢首歌? 當時全場爆笑。

諗真d, 又好中, 個歌名係好合適, 首歌又真係好聽到不得了, 但又從來無人提出黃子華的point, 哈, 真係抵條友紅!

點都好, 祝亞視的《樂壇風雲50年》收視蒸蒸日上, 因為實在太多好聽的舊歌了! 也祝各位母親, 首先當然是我母親---母親節快樂, 身體健康!! :)