亢龍有悔

2008年澳洲網球公開賽四強賽中, 一哥費達拿, 我的偶像, 被本賽事3號種子塞爾維亞的祖高域打敗了。我在電視前見證著費達拿的一記正手落網, 結束了他連續10次打入大滿貫決賽的紀錄, 也終止了他澳網三連冠。

其實今次費達拿和祖高域都有極大的壓力, 祖高域去到最後關頭, 頻頻深呼吸; 而費達拿保持一貫的冷靜表情, 但表情背後, 從他的頻頻正手失誤, 已足見佢壓力極大。祖高域成功處理了壓力, 抵佢贏。

其後不時聽電台提及這個消息, 我真係有d「心up」, 真係有d唔高興。

不過, 凡事都兩面睇。費達拿的壓力太大啦, 他是球王, 但不是超人, 畢竟連續209週高居世界第一, 真是有點高處不勝寒。所謂「亢龍有悔」, 凡事又唔好去到咁盡, 偶爾落下來, 休息下都是好事。其實對費達拿來說, 現在最重要的, 就是拿下法國網球公開賽冠軍和奧運金牌, 再拿多一個大滿貫, 平了前球王森帕斯的紀綠, 咁就完美了。

今次對費達拿來說, 可能係一次釋放壓力的機會, 希望他今年繼續有好表現吧!

股市跳樓機

現在的港股, 已不是坐過山車咁簡單, 而是坐跳樓機! 昨天才跌2千點, 今天又回升2千300點, 兩日的淨升幅是上升300點。遲d會唔會單日波幅4千點?

學林sir講, 現在的市場已不是牛市, 也不是熊市, 而是狼市! 對沖基金要利用波幅來賺大錢! 今日與昨日, 藍籌股竟當仙股咁炒! 匯控升11.3%, 中移動升10.4%, 建行升16%, 人壽升15.7%!! 昨日被震走的散戶真是欲哭無淚, 昨日炒孖展被迫斬倉的又是慘... 唉, 面對跳樓機式的波幅, 一動不如一靜, 坐係度睇煙花算了。

有錢在昨日入市的人, 真係要講聲恭喜。雖然今日大升, 但又可能係最後一波俾你走人, 可能之後會再大插都未定。不過, 世界上專業的人很多, 他們都識計數, 美國放緩, 即使衰退, 會對中國有多大影響? 資金會流向哪裡(肯定唔會係美國和日本, 又未必是歐洲, 因為美元貶值會把衰退傳給歐洲)? 會唔會任恆指跌破2萬點, 甚麼1萬9千點? 3月是業績月, 到時恆指PE又會回落。你是基金經理, 會點揀?

恐荒性拋售, 心態最重要

今天(08年1月22日)恆指再大跌超過2千點(跌8.6%), 收市報21,757點。
恆指07年10月30日的歷史高位31,958點, 累積跌幅32%! 已經算是小股災了。
上證綜指07年10月中歷史高位約6,100點, 今日收報4,560點, 跌25%。
道指07年10月9日收報14,164點,08年1月18日報12,100點, 跌14.6%。
納指07年10月31日收報2,859點, 08年1月18日報2,340點, 跌18.2%。
日指07年10月11日收報17,458點, 今日報12,573點, 跌28%。
英國富時100指數07年10月31日收報6,721點, 08年1月21日收報5,578點, 跌17%。
德國DAX指數07年10月31日收報8,019點, 08年1月21日收報6,790, 跌15.3%。

總結了環球主要指數, 香港的跌幅最大, 日本第二, 上證綜指第三。日本跌咁多不出奇, 談基本因素, 它的人口老化問題, 令其經濟長遠不被看好。上證綜指, 早就存有泡沫, 現在作出大調整, 讓股市冷卻, 是好事, 有利持續發展。至於香港, 跌幅幾乎是美國的2倍, 是否跌幅過度呢？

現在香港和內地的基本因素無甚麼大變, 最受影響就是中國的出口會因為美國經濟放緩而放慢。這個也正是國策之一, 就是減少對出口的依賴, 擴大內需。內地近期提高出口稅就是為這個目的。

從最近6個交易日, 中移動的跌勢, 可以看出股市是超賣的。中移動由1月14日的$130.2跌至今天的$108.9。早前林sir已詳細分析過中移動的基本因素, 說$123是中移動的十分合理的估值。再者, 今日《信報》報道, 中移動07年12月上客增長創歷史新高, 反而中電信和網通則創下單月客戶淨流失最多紀錄。

中移動和匯控都是恆指成分股的重磅股, 要壓低恆指, 相信從這兩隻股入手最好, 匯控被預期業績差甚至見紅, 可理解。但中移動超賣, 真是恐荒性拋售, 已不再是基金換馬, 而是「洗倉」。壓到咁低, 會否又是對沖基金做的好事呢？不知, 要聽林sir分析。

從這次小股災, 我沒有資金損失, 因為我一直持有, 而我損失的, 有兩個: 一是由於我大部分資產都買了股票(但已是早排跌一半時買入的), 現在現金比例小, 錯失了今次的入市黃金機會；二是短期內資金被鎖住。

(我認為今次小股災是短期, 點解? 全球資金撤出資本市場, 會流向哪裡? 我覺得是台灣和內地。內地人仔繼續升值, 中國仍在高速增長, 股市又調整了這麼多, 不投資這裡投資哪裡？雖然美國的股市也跌了很多, 但美國的前景不被看好, 最起碼將來一年不被看好。香港也會受惠, 因為外資會透過香港市場買人仔資產。如果咁多資金一齊湧入香港, 難道真是如林sir話, 有可能香港股市會升到你唔信？)

我的投資是長線投資, 投資年期起碼兩年, 大多數更是五年或更長。我的預期平均年回報是15%至20%。中途發生甚麼事, 都不應受影響。就好似存定期, 存2年, 2年後收取一個預期回報, 中間過程銀行把你的錢借出, 不是相似情況嗎？你的錢也同樣流出你的戶口。

從今次跌市我也學到一些東西, 就是一定要預留現金, 特別在升市從頂部回落, 就應該增持現金。但一旦作出長線投資決定(一定是買入優質的公司), 而且起碼要在(林sir的)「第3隻腳」才開始買入, 而且買入後就要堅持原先的目標。稍為心動, 隨時被「震出」。

有人問我「有無後悔當初高位唔放」, 我亦自己問自己, 但無人知道哪裡是頂, 從歷史事實做決定永遠是正確的, 所以無謂「馬後炮」。今次跌市, 最好遠離股市, 又適逢澳洲網球公開賽, 我緊張個賽程仲緊要過個市, 幾正! 睇見費達拿入8強, 今日中國「川妹子」的雙打又逆轉反勝威廉絲姊妹, 超興奮, 真係話之佢跌破2萬點。如果跌市仲日日睇實個市, 咪盞心up。

信用卡(一): 「最低還款額」陷阱

今晚聽電台講信用卡理財, 自己又從事信用卡業務, 平時又常用信用卡, 在此分享下用信用卡的心得。心得多的是, 要分開幾集。

我本人是絕對讚同使用信用卡, 因為它的確為我帶來很多方便與著數。在談信用卡的方便與著數之前, 先要了解信用卡的陷阱。

信用卡是「先洗未來錢」, 對於「大花灑」(即是花錢多而又沒有計劃的人)來說, 的確要小心。因為他們的花費能力遠超過其還款能力。基於理財的立場, 本人絕不建議這類人使用信用卡, 因為信用卡的陷阱是專為這類人而設。(不過, 正是因為有這類人, 才養起從事信用卡業務的所有人, 嘻嘻!)

第一個陷阱, 是「最低還款額」。還清「最低還款額」, 只是避免你的信貸評級不被「寫花」, 因為這樣等於向信貸評級機構表示你「有錢還」。若連「最低還款額」也不還, 表示你「有借無還」, 你的信貸評級會被降級。

除非你100%還清帳單, 否則你在該張信用卡的任何消費和未償還清的負債都會馬上計息, 年息30幾厘! 無錯, 只要你在「到期付款日」前仍未還清該期的欠款, 你之後用信用卡作任何的消息都計你息, 例如去超市刷卡要計息, 飲食簽帳又要計息! 無論你有幾十元未還清, 還是幾千元未還清, 都是一樣。這些在發卡時付帶的條文寫得一清二楚, 只是一般人不看罷了。

「最低還款額」其實僅夠償還利息, 若長期只還「最低還款額」, 後期可能連利息都不夠付, 於是卡數越積越多, 好似雪球咁, 越滾越大。如果真是無能力還清卡數, 豈不要眼白白看著銀行每日計你每年30幾厘的利息? 下次再講。

《色戒》與牛腩面

今日租了《色戒》dvd, 看完, 感覺無咩特別。(好彩唔係買!)

論故事情節, 又是熱血愛國青少設局殺害漢奸, 又是用美人計埋身, 最後計劃失敗遭處決......絕對舊橋。不過李安十分聰明, 學我個朋友話齋, 李安只是將中國的劇集的舊橋重新包裝再賣向國際。 重新包裝過程中, 加入了女新人湯唯和梁朝偉。

全場賣點, 講得白d, 莫過於湯唯露點和梁朝偉全裸登場。(如果有人話睇《色戒》唔係為左睇湯唯露點同埋梁朝偉全裸戲, 即係話你聽, 佢叫碗牛腩面唔係為左食牛腩, 而係貪d面索左d腩汁好食) 湯唯, 作為一個無人認識的新人, 露點絕對不會很賣得, 但加入梁朝偉的全裸床上戲, 就唔同晒, 十分有睇頭。傳聞梁朝偉仲露埋蛋添! 我的一些朋友只入電影院看過一次, 同我講梁朝偉露蛋。不過我睇完一次後, 又真係唔係好覺有咁o既鏡頭, 恐怕係一秒都唔夠。我睇果陣已經好鬼留意梁朝偉露蛋的鏡頭。唉, 我都覺得我有問題, 一個男士, 第一次睇呢出戲, 目光竟然係注視梁朝偉, 而不是湯唯...你話啦, 我d朋友睇過一次咁大把, 竟然留意到梁朝偉露蛋? 我就覺得d人係人雲亦雲居多。有d睇過dvd的朋友話定格放大會睇到。不過, 我覺得唔值得花時間去尋找這個shot。原本我諗住copy隻碟, 但依家認為唔好浪費一個碟。我唔會睇第二次囉...

李安另一聰明之處, 能夠取得如此多票房, 就是提供一個黃金機會俾大眾男男女女名正信順睇三級片。老實講, 我就覺得《色戒》同一般三級片無分別。只是該片導演是李安, 人人都把它叫做"文藝片", 主角又係梁朝偉喎, 唔同, 我係去睇文藝片o者。從咁多人睇呢出戲, 可見其實人人都好想睇三級片, 只係平時要顧及所謂的"道德"而收收埋埋。入去影音鋪買隻三仔, 大眾總係會覺得唔好意思。我又未見過d鋪頭大大張poster宣傳"有三級片賣"。但今次d人入去拿起隻《色戒》黎睇, 甚至買, 都一定大大方方。

仲有樣野幾搞笑, 就係內地的《色戒》全部cut晒d床上戲, 即係"牛腩面走腩"! 內地大把電視劇係呢d橋段啦, 真係睇到你厭。我俾幾十元入戲院睇, 你同我cut晒?! 我有個朋友千里迢迢來香港買《色戒》, 問佢點解, 佢話內地d正版同翻版(現場版)都無野睇o既!

再見Netscape

http://blog.netscape.com/2007/12/28/end-of-support-for-netscape-web-browsers/

Netscape正式宣佈Netscape的終結, 從2008年2月1日後, Netscape的browser不再有support, 取而代之的是Mozilla Firefox(換品牌)。Netscape對很多網絡老手來說是一個舊朋友, 不過, 我只用過幾次, 因為都係用慣IE。

始創產品未必最好, 未必持久, 反而改裝的東西再加上好的市場策略, 才是王道。世界上無幾多個發明, 但有無數改良。所以我始終覺得, creative重要, innovative更重要! 睇微軟就知啦! 還有, 中國發明火藥, 結果如何?

科技日新月異, 一個稍為停步不前, 就可能被淘汰。記得當年的Yahoo一時無兩, 但Google面世後, 幾乎壟斷了網絡的一切, 我也開始漸忘Yahoo, 除了睇新聞、查字典、翻查過往股價外, 我完全無用Yahoo的任何service(幾乎忘了它的搜尋功能), 因為Google的相同的service更user-friendly, 更powerful。

MS和Google可以持續幾耐? 真係好想知! 但我知Apple開始再追上來了, 因為身邊越來越多朋友用Mac產品了。不過, "抄襲"始終都是MS的"專利"......

2007全年新股表現

2007年過去, 抽新股在07年裡是一個熱門話題, 究竟全年的新股表現如何？我做了個很簡單的統計。(資料來源: 財華網和AASTOCKS)

由於兩個資料來源都不全面, 例如財華網提供最新收市價只是截至2007年12月28日, 也缺少每手股數, 而AASTOCKS有每手股數, 又沒有用一個表羅列最新報價(不想逐個輸入), 所以股價只是截至2007年12月28日。

全年共有83隻新股上市, 假設每隻新股都成功抽到一手(抽白表, 無手續費), 而且一直持有至年尾, 成績如下圖所示:

根據雅虎財經的過往股價顯示, 2007年1月2日恆指收報20,310點, 12月28日收報27,370點, 回報有35%。即是話, 如果次次都抽中新股而又持有至年尾, 是跑輸大市的。當然, 這個統計純粹娛樂, 又有何人隻隻新股都抽中又持有至年尾呀?